పయనించే సూర్యుడు డిసెంబర్ 27 నాగర్ కర్నూలు జిల్లా రిపోర్టర్ నాగర్కర్నూల్, జిల్లా జర్నలిస్టుల అక్రిడిటేషన్ విషయంలో ప్రభుత్వం జారీ చేసిన జీవో 252ను వెంటనే రద్దు చేయాలని డిమాండ్ చేస్తూ, రేపు (శనివారం) నాగర్కర్నూల్ జిల్లా కలెక్టరేట్ వద్ద ‘చలో కలెక్టరేట్’ ధర్నా నిర్వహించనున్నట్లు జర్నలిస్టు సంఘాల నాయకులు పిలుపునిచ్చారు. ఈ మేరకు తెలంగాణ యూనియన్ ఆఫ్ వర్కింగ్ జర్నలిస్ట్స్ H-143 మరియు తెలంగాణ జర్నలిస్ట్స్ ఫోరం సంయుక్తంగా ఈ నిరసన కార్యక్రమాన్ని చేపడుతున్నాయి. ఈ సందర్భంగా జిల్లా అధ్యక్షులు చంద్రశేఖర రావు మరియు ప్రదీప్ మాట్లాడుతూ.. ప్రభుత్వం తీసుకువచ్చిన కొత్త నిబంధనలు జర్నలిస్టుల హక్కులను కాలరాసే విధంగా ఉన్నాయని మండిపడ్డారు. ప్రధాన డిమాండ్లు ఇవే: జీవో 252 రద్దు: జర్నలిస్టులకు ఇబ్బందికరంగా మారిన జీవో 252ను ప్రభుత్వం తక్షణమే వెనక్కి తీసుకోవాలి. పాత పద్ధతిలోనే అక్రిడిటేషన్లు: గతంలో అమల్లో ఉన్న జీవో 239 తరహాలోనే, అర్హులైన ప్రతి జర్నలిస్టుకు అక్రిడిటేషన్ కార్డులు మంజూరు చేయాలి. డెస్క్ జర్నలిస్టులకు న్యాయం: క్షేత్రస్థాయిలో పని చేసే వారితో పాటు, డెస్క్ జర్నలిస్టులపై వివక్ష చూపకుండా అందరికీ కార్డులు ఇచ్చేలా చర్యలు చేపట్టాలి. జర్నలిస్టులందరూ తరలిరావాలి: జిల్లాలోని జర్నలిస్టులందరూ తమ హక్కుల సాధన కోసం రాజకీయాలకు అతీతంగా ఈ ధర్నాలో పాల్గొని విజయవంతం చేయాలని వారు కోరారు. అక్రిడిటేషన్ కార్డుల జారీలో ప్రభుత్వం జాప్యం చేయడం వల్ల క్షేత్రస్థాయి జర్నలిస్టులు అనేక ఇబ్బందులు ఎదుర్కొంటున్నారని ఆవేదన వ్యక్తం చేశారు.
