నాగారంలో యథేచ్ఛగా అక్రమ కట్టడాలు: నిమ్మకు నీరెత్తినట్లు వ్యవహరిస్తున్న అధికారులు!

పయనించే సూర్యుడు / మేడ్చల్ జిల్లా ఘట్కేసర్ సర్కిల్ నాగారం జనవరి 10 (ప్రతినిధి): ఘట్కేసర్ సర్కిల్ పరిధిలోని నాగారం మున్సిపాలిటీలో అక్రమ కట్టడాల పర్వం మూడు పువ్వులు ఆరు కాయలుగా వర్ధిల్లుతోంది. నిబంధనలను తుంగలో తొక్కి, అధికారుల కళ్లు గప్పి కొందరు బిల్డర్లు సాగిస్తున్న నిర్మాణాలు పచ్చని కాలనీలను అస్తవ్యస్తం చేస్తున్నాయి. మున్సిపల్ అధికారుల పర్యవేక్షణ లోపం, క్షేత్రస్థాయిలో జరుగుతున్న అక్రమాలపై 'మాకేం పట్టనట్టు' వ్యవహరిస్తున్న తీరుపై స్థానికుల నుండి తీవ్ర విమర్శలు వెల్లువెత్తుతున్నాయి. అనుమతులు ఒకదారి.. నిర్మాణాలు మరోదారి నాగారం పరిధిలో వెలుస్తున్న బహుళ అంతస్తుల భవనాలకు అనుమతులు కేవలం స్టిల్ట్ (పార్కింగ్) ప్లస్ రెండు అంతస్తులకు మాత్రమే ఉన్నాయి. కానీ, వాస్తవ పరిస్థితి చూస్తే అది భిన్నంగా ఉంది. బిల్డర్లు నిబంధనలకు విరుద్ధంగా స్టిల్ట్ ప్లస్ మూడు అంతస్తుల నిర్మాణాలను శరవేగంగా పూర్తి చేస్తున్నారు. మూడో అంతస్తుకు ఎలాంటి అనుమతులు లేకపోయినప్పటికీ, దర్జాగా పిల్లర్లు లేపి స్లాబులు వేస్తున్నారు. అంతటితో ఆగకుండా ప్రతి భవనంపై అదనంగా పెంట్ హౌస్‌లు నిర్మిస్తూ ప్రభుత్వ నిబంధనలను పూర్తిగా గాలికొదిలేస్తున్నారు. సెట్ బ్యాక్ మాయం.. మామూళ్ల మాయాజాలం! భవన నిర్మాణ నిబంధనల ప్రకారం చుట్టూ కొంత ఖాళీ స్థలం (సెట్ బ్యాక్) వదలాల్సి ఉంటుంది. కానీ ఇక్కడ అంగుళం స్థలం కూడా వదలకుండా ఏకంగా రోడ్లకు ఆనుకొని గోడలు నిర్మిస్తున్నారు. ఇంత బహిరంగంగా అక్రమ కట్టడాలు జరుగుతున్నా, మున్సిపల్ టౌన్ ప్లానింగ్ అధికారులు కనీసం అటువైపు కన్నెత్తి చూడకపోవడం వెనుక పెద్ద ఎత్తున 'మామూళ్ల' పర్వం నడుస్తోందని స్థానికులు బహిరంగంగానే ఆరోపిస్తున్నారు. అక్రమ నిర్మాణాలకు అధికారులు పరోక్షంగా సహకరిస్తున్నారని, అందుకే నోటీసులు ఇచ్చేందుకు కూడా వెనుకాడుతున్నారని కాలనీవాసులు వాపోతున్నారు. సమస్యల వలయంలో కాలనీలు ఈ అక్రమ కట్టడాల వల్ల భవిష్యత్తులో తీవ్రమైన డ్రైనేజీ, తాగునీరు మరియు పార్కింగ్ సమస్యలు తలెత్తే ప్రమాదం ఉందని పౌర సమాజం ఆందోళన వ్యక్తం చేస్తోంది. అధికారుల అలసత్వం వల్ల ప్రభుత్వ ఆదాయానికి గండి పడటమే కాకుండా, నిబంధనల ప్రకారం ఇళ్లు నిర్మించుకునే సామాన్యులకు ఇబ్బందులు ఎదురవుతున్నాయి. ఉన్నతాధికారులు స్పందించాలి: ఇప్పటికైనా జిల్లా ఉన్నతాధికారులు తక్షణమే స్పందించి నాగారం మున్సిపాలిటీ పరిధిలో జరుగుతున్న అక్రమ నిర్మాణాలపై సమగ్ర విచారణ జరపాలని స్థానికులు డిమాండ్ చేస్తున్నారు. అనుమతికి మించి నిర్మించిన అదనపు అంతస్తులను వెంటనే కూల్చివేసి, బాధ్యులైన బిల్డర్లపై మరియు వారికి సహకరిస్తున్న అధికారులపై కఠిన చర్యలు తీసుకోవాలని కోరుతున్నారు.