నిరంతరం సమాజ చైతన్యంలో ‘ప్రజాపక్షం’ పాత్ర అమోఘం

పయనించే సూర్యుడు, జనవరి 13, బచ్చన్నపేట మండల ప్రతినిధి: నీల పవన్. నిరంతరం ప్రజా సమస్యల పరిష్కారం కోసం గళమెత్తుతూ, నిష్పక్షపాత వార్తలతో దూసుకుపోతున్న 'ప్రజాపక్షం' దినపత్రిక సమాజ హితం కోరే పత్రిక అని బచ్చన్నపేట ఎస్సై ఎస్.కె. హమీద్ అన్నారు. సోమవారం స్థానిక పోలీస్ స్టేషన్‌లో ప్రజాపక్షం దినపత్రిక - 2026 నూతన సంవత్సర క్యాలెండర్‌ను బచ్చన్నపేట మండల విలేకరి తేలుకంటి శ్రీనివాస్ తో కలిసి ఆయన ఘనంగా ఆవిష్కరించారు. ​అనంతరం ఎస్సై ఎస్.కె హమీద్ మాట్లాడుతూ ప్రజాస్వామ్యంలో మీడియా పాత్ర అత్యంత కీలకమని,రాజ్యాంగం కల్పించిన నాలుగో స్తంభంగా జర్నలిజం సమాజ అభివృద్ధికి తోడ్పడుతోందని అన్నారు. వృత్తి పట్ల నిబద్ధతతో పనిచేస్తున్న జర్నలిస్టులకు ఆయన ఈ సందర్భంగా ప్రత్యేక శుభాకాంక్షలు తెలిపారు.​ నిజాలను వెలికితీయడంలో, ప్రజల పక్షాన నిలబడటంలో ప్రజాపక్షం పత్రిక జాతీయ స్థాయిలో ప్రత్యేక గుర్తింపు తెచ్చుకుందని ఆయన ప్రశంసించారు. పాఠకుల మనసు గెలుచుకునేలా వార్తా కథనాలను అందిస్తూ, ప్రజల్లో చైతన్యాన్ని రేకెత్తించడం ఒక్క మీడియాకే సాధ్యమని ఆయన పేర్కొన్నారు. ​ప్రజా సమస్యలను అధికారుల దృష్టికి తీసుకురావడంలో పత్రిక చూపుతున్న చొరవ అభినందనీయమన్నారు. ​ఈ కార్యక్రమంలో పోలీస్ సిబ్బంది నర్సిరెడ్డి, అఖిల, రాకేష్, నవీన్ రెడ్డి, విజయ్, మహేష్, వినయ్ పాల్గొన్నారు.