భూకబ్జాల పర్వం

పయనించే సూర్యుడు మార్చి 7 కర్నూలు జిల్లా ఇంచార్జ్ శ్రీకాంత్. ఆదోని మండలం పెద్ద తుంబలం గ్రామంలో ప్రభుత్వ భూములపై అక్రమ నిర్మాణాలు జరుగుతున్నాయనే ఆరోపణలు గ్రామంలో తీవ్ర చర్చనీయాంశంగా మారాయి. గ్రామ పరిధిలోని సర్వే నంబర్ బి 360లో ఉన్న ప్రభుత్వ భూమిని కొందరు వ్యక్తులు కబ్జా చేసి నిర్మాణాలు చేపడుతున్నారని స్థానికులు ఆరోపిస్తున్నారు. గ్రామస్తుల సమాచారం ప్రకారం, ఆ భూమిలో ఇప్పటికే అక్రమంగా షెడ్లు, గోడలు నిర్మించడం జరుగుతుండగా మరికొన్ని నిర్మాణాలు కూడా వేగంగా కొనసాగుతున్నాయని చెబుతున్నారు. ఈ భూమి ప్రభుత్వానికి చెందినదిగా ఉండి, గ్రామంలోని పేదలు మరియు భూమిలేని కుటుంబాలకు భవిష్యత్తులో కేటాయించాల్సిన భూమి అని గ్రామ పెద్దలు పేర్కొంటున్నారు. అయితే కొందరు వ్యక్తులు అధికారాన్ని మరియు ప్రభావాన్ని ఉపయోగించుకొని ఆ భూమిని తమ ఆధీనంలోకి తీసుకునే ప్రయత్నం చేస్తున్నారని గ్రామస్థులు ఆరోపిస్తున్నారు. ఇలాంటి అక్రమ నిర్మాణాలు జరుగుతున్న విషయం స్థానిక రెవెన్యూ అధికారులకు తెలిసినా ఇప్పటివరకు ఎలాంటి కఠిన చర్యలు తీసుకోలేదని గ్రామ ప్రజలు అసంతృప్తి వ్యక్తం చేస్తున్నారు. కొందరు గ్రామస్థులు పలుమార్లు అధికారుల దృష్టికి ఈ సమస్యను తీసుకెళ్లినప్పటికీ స్పందన లేకపోవడంతో ప్రజల్లో ఆగ్రహం వ్యక్తమవుతోంది. ప్రభుత్వ భూములను రక్షించాల్సిన బాధ్యత ఉన్న అధికారులు నిర్లక్ష్యంగా వ్యవహరిస్తున్నారనే విమర్శలు కూడా వినిపిస్తున్నాయి. వెంటనే అధికారులు స్పందించి అక్రమ కబ్జాలను అరికట్టి, ప్రభుత్వ భూములను రక్షించాలని గ్రామ ప్రజలు డిమాండ్ చేస్తున్నారు. అదే విధంగా ఈ భూమిపై జరుగుతున్న నిర్మాణాలపై సమగ్ర విచారణ చేపట్టి, బాధ్యులపై చర్యలు తీసుకోవాలని కోరుతున్నారు. ఇలా ప్రభుత్వ భూములు కబ్జాకు గురవుతుంటే పేదలకు న్యాయం ఎలా జరుగుతుందని గ్రామస్థులు ప్రశ్నిస్తున్నారు. ఇప్పటికైనా అధికారులు స్పందించి తగిన చర్యలు తీసుకుంటారా? లేక ఈ భూకబ్జాలు ఇలాగే కొనసాగుతాయా? అనే ప్రశ్నలు గ్రామంలో వినిపిస్తున్నాయి.