కోరుట్ల పట్టణానికే తలమానికం ‘గడి గురుజులు ‘

పయనించే సూర్యుడు, కోరుట్ల, మార్చి 17 కోరుట్ల పట్టణంలోని 28వ వార్డులో గల చారిత్రక కట్టడం "గడి గురుజుల" వద్ద భారీ జాతీయ జెండాను ఏర్పాటు చేయాలని ఆ వార్డు కౌన్సిలర్ కొక్కెర వెంకటేష్ డిమాండ్ చేశారు. సోమవారం ఆయన మున్సిపల్ కమిషనర్‌ కార్యాలయంకు, మరియు మున్సిపల్ చైర్ పర్సన్ శ్రీమతి తిరుమల వసంత గంగాధర్, వైస్ చైర్మన్ మహ్మద్ షాహిద్ ని కలిసి ఈ మేరకు వినతి పత్రం సమర్పించారు. ఇటీవల మున్సిపల్ సాధారణ సమావేశంలో పట్టణ గౌరవార్థం ఒక చోట అత్యంత ఎత్తైన జాతీయ జెండాను ఏర్పాటు చేయాలని ఎజెండాలోని 20వ అంశంగా నిర్ణయించిన సంగతి తెలిసిందే. ఈ నిర్ణయాన్ని స్వాగతిస్తూ, ఆ జెండాను ఏర్పాటు చేయడానికి గడి గురుజుల ప్రాంతమే అత్యంత అనువైనదని వెంకటేష్ పేర్కొన్నారు. ఈ సందర్భంగా ఆయన మాట్లాడుతూ "కోరుట్ల పట్టణ చరిత్రలో గడి గురుజులకు ప్రత్యేక గుర్తింపు ఉంది. ఇప్పటికే ఈ కట్టడం జాతీయ జెండా రంగులతో అలరారుతూ ప్రజలను ఆకట్టుకుంటోంది. ఇక్కడ హై మాస్ట్ ఫ్లాగ్ ఏర్పాటు చేయడం వల్ల ఆ చారిత్రక కట్టడానికి మరింత శోభ రావడమే కాకుండా, పట్టణానికి వచ్చే పర్యాటకులకు మరియు ప్రజలకు ఇది ఒక ప్రత్యేక ఆకర్షణగా నిలుస్తుంది. మున్సిపల్ పాలక వర్గం మరియు అధికారులు సానుకూలంగా స్పందించి, వెంటనే పనులు ప్రారంభించాలని కోరుతున్నారు.