జహీరాబాద్ ఈద్గా వద్ద రంజాన్ ఏర్పాట్లను పరిశీలించిన మున్సిపల్ చైర్మన్ మహమ్మద్ యూనుస్

పయనించే సూర్యుడు మార్చ్ 17 (సంగారెడ్డి జిల్లా జహీరాబాద్ మండలం ప్రతినిధి స్వాతి.నర్సిములు ) జహీరాబాద్ పట్టణ మున్సిపల్ పరిధిలోని ముస్లిం సోదరులు రంజాన్ పర్వదినం సందర్భంగా నిర్వహించుకునే ఈదుల్ ఫితుర్ నమాజ్ కోసం ఈద్గా మైదానంలో అన్ని రకాల ఏర్పాట్లను అత్యంత త్వరితగతిన పూర్తి చేయాలని మున్సిపల్ చైర్మన్ మహమ్మద్ యూనుస్ అధికారులను ఆదేశించారు. సోమవారం సాయంత్రం ఆయన స్థానిక కౌన్సిలర్లు మరియు ముఖ్య నాయకులతో కలిసి పట్టణంలోని ప్రధాన ఈద్గా ప్రాంగణాన్ని సందర్శించి, అక్కడ జరుగుతున్న పనులను క్షేత్రస్థాయిలో పరిశీలించారు. ఈ సందర్భంగా చైర్మన్ మాట్లాడుతూ, పండుగ రోజున ఈద్గాకు వేలాది సంఖ్యలో భక్తులు హాజరవుతారని, వారికి ఎటువంటి అసౌకర్యం కలగకుండా మున్సిపల్ యంత్రాంగం అన్ని జాగ్రత్తలు తీసుకోవాలని సూచించారు. ముఖ్యంగా ఈద్గా పరిసరాల్లో పారిశుధ్య పనులను ముమ్మరం చేయాలని, బ్లీచింగ్ పౌడర్ చల్లించి అపరిశుభ్రత లేకుండా చూడాలని మున్సిపల్ సిబ్బందికి స్పష్టమైన ఆదేశాలు జారీ చేశారు. ఎండ తీవ్రతను దృష్టిలో ఉంచుకుని నమాజ్ కోసం వచ్చే భక్తుల కోసం సరిపడా త్రాగునీటి సౌకర్యం కల్పించాలని, అలాగే విద్యుత్ సరఫరాలో ఎటువంటి అంతరాయం కలగకుండా ముందస్తు చర్యలు తీసుకోవాలని అధికారులను కోరారు. ప్రజా ప్రతినిధులు మరియు అధికారులు సమన్వయంతో పనిచేసి పండగ ఏర్పాట్లను సకాలంలో పూర్తి చేయాలని, భక్తులకు అవసరమైన షామ్యానాలు మరియు ఇతర వసతులను సిద్ధం చేయాలని ఆయన ఆదేశించారు. ఈ కార్యక్రమంలో మున్సిపల్ అధికారులు, వార్డు కౌన్సిలర్లు మరియు స్థానిక నాయకులు పెద్ద సంఖ్యలో పాల్గొని ఏర్పాట్లపై చర్చించారు.