పయనించే సూర్యుడు మార్చ్ 23 అనపర్తి నియోజకవర్గం ఇంచార్జ్ సురేష్ అనపర్తి నియోజకవర్గంలో రాజకీయ పరిణామాలు వేగంగా మారుతున్నాయి. మహేంద్రవాడ గ్రామంలో వైఎస్సార్ కాంగ్రెస్ పార్టీ నూతన కార్యాలయ ప్రారంభోత్సవం సందర్భంగా నిర్వహించిన కార్యక్రమంలో జనసేన పార్టీకి చెందిన కీలక నాయకుడు సబ్బెళ్ళ శ్రీనివాసరెడ్డి తన అనుచరులతో కలిసి మాజీ ఎమ్మెల్యే డాక్టర్ సత్తి సూర్యనారాయణ రెడ్డి సమక్షంలో వైఎస్సార్సీపీలో చేరారు. కాపు సోదరులపై వేధింపులు సహించం: సబ్బెళ్ళ శ్రీనివాసరెడ్డి ఈ సందర్భంగా శ్రీనివాసరెడ్డి మాట్లాడుతూ, 2014 మరియు 2024 ఎన్నికల్లో నల్లమిల్లి రామకృష్ణారెడ్డి విజయం సాధించడంలో పవన్ కళ్యాణ్ ప్రభావం, జనసేన కార్యకర్తల అహర్నిశల శ్రమ మరియు కాపు ఓటర్ల మద్దతు ప్రధాన పాత్ర పోషించాయని గుర్తు చేశారు. అయితే, అధికారంలోకి వచ్చిన తర్వాత స్థానిక ఎమ్మెల్యే తన గెలుపుకు సహకరించిన అదే కాపు సోదరులపై, అదే జనసేన కార్యకర్తలపై వేధింపులకు దిగడం అత్యంత దారుణమని మండిపడ్డారు. ఎమ్మెల్యే చూపిస్తున్న ఈ వివక్షా పూరిత వైఖరి జనసైనికులను తీవ్ర నిరాశకు గురి చేస్తోందని ఆయన ఆవేదన వ్యక్తం చేశారు. ప్రజా సమస్యలే అజెండాగా ముందుకు: డాక్టర్ సత్తి సూర్యనారాయణ రెడ్డి మాజీ ఎమ్మెల్యే డాక్టర్ సత్తి సూర్యనారాయణ రెడ్డి మాట్లాడుతూ, కూటమి ప్రభుత్వం కేవలం పీఆర్ స్టంట్లకే పరిమితమైందని, క్షేత్రస్థాయిలో ప్రజల కష్టాలను పట్టించుకోవడం లేదని విమర్శించారు. అధికారం అండతో ప్రతిపక్షాలను, మిత్రపక్షాలను ఇబ్బంది పెడుతున్నారని ధ్వజమెత్తారు. ఎన్ని అడ్డంకులు ఎదురైనా వైఎస్సార్సీపీ కార్యకర్తలు ప్రజల పక్షాన నిలబడి పోరాటం చేస్తారని స్పష్టం చేశారు. ఈ కార్యక్రమంలో వైఎస్సార్ కాంగ్రెస్ పార్టీకి చెందిన ముఖ్య నాయకులు, భారీ సంఖ్యలో కార్యకర్తలు మరియు మహేంద్రవాడ గ్రామస్తులు పాల్గొన్నారు. కొత్తగా పార్టీలో చేరిన వారికి డాక్టర్ సత్తి సూర్యనారాయణ రెడ్డి పార్టీ కండువాలు కప్పి సాదరంగా ఆహ్వానించారు.
