పయనించే సూర్యుడు న్యూస్ మార్చి 26 అశ్వారావుపేట మండలం రిపోర్టర్ భద్రాద్రి కొత్తగూడెం జిల్లా అశ్వారావుపేట మా భూమి మాకే మా హక్కు మాకే అంటూ దశాబ్దాలుగా సాగుతున్న పోరాటం, పది రోజులుగా సాగిన మొక్కవోని దీక్ష ఎట్టకేలకు ఫలించింది. తమ భూములపై హక్కుల కోసం, ఆత్మగౌరవం కోసం రామన్నగూడెం ఆదివాసీలు చేసిన అలుపెరగని పోరాటం జిల్లా యంత్రాంగాన్ని కదిలించింది. జాయింట్ కలెక్టర్ సానుకూల హామీతో ఆదివాసీలు తమ నిరవధిక నిరాహార దీక్షను బుధవారం విరమించారు. రామన్నగూడెం గ్రామానికి చెందిన ఆదివాసీలు ఎదుర్కొంటున్న భూ సమస్యల పరిష్కారం కోసం కలెక్టరేట్ ఎదుట గత తొమ్మిది రోజులుగా నిరసన జ్వాలలు ఎగిసిపడ్డాయి. ఎముకలు కొరికే చలిని, పోలీసుల లాఠీ దెబ్బలను, అక్రమ కేసులను సైతం లెక్కచేయకుండా, మడమ తిప్పని పట్టుదలతో వారు సాగించిన దీక్షా దక్షత జిల్లావ్యాప్తంగా చర్చనీయాంశమైంది. బుధవారం ఉదయం జాయింట్ కలెక్టర్ నిరసనకారులతో ప్రత్యేకంగా సమావేశమై, వారి డిమాండ్లన్నింటినీ పరిష్కరిస్తామని స్పష్టమైన హామీ ఇచ్చారు. ఏప్రిల్ 1 నుండి క్షేత్రస్థాయిలో సర్వే ఆదివాసీల డిమాండ్ల మేరకు జె.సి. కీలక నిర్ణయాలను ప్రకటించారు. ఇప్పటికే పట్టా కలిగి ఉండి, క్షేత్రస్థాయిలో భూమి చూపించని వారికి ఆ భూమిని గుర్తించి అప్పగిస్తారు. భూమి ఉండి పట్టాలు లేని వారందరికీ కొత్త పట్టాలు మంజూరు చేస్తారు. ఇప్పటికే తాత ముత్తాతల కాలం నుండి సాగులో ఉండి రికార్డులు లేని వారికి, ఏజెన్సీ చట్టాల (1/70) ప్రకారం హక్కులు కల్పిస్తారు. సర్వే నెంబర్లలో బై నెంబర్లు ఉన్నా, లేకపోయినా క్షుణ్ణంగా పరిశీలించి భూమిని చూపిస్తారు. ఈ ప్రక్రియ అంతా ఏప్రిల్ 1వ తేదీ నుండి ప్రారంభమవుతుందని, గ్రామసభ నిర్ణయం మేరకే, ప్రజల సమక్షంలోనే సర్వే నిర్వహిస్తామని జె.సి. హామీ ఇచ్చారు. ఇందుకోసం 10 మంది సర్వేయర్లతో ప్రత్యేక బృందాన్ని సిద్ధం చేశారు. ఇది ఆదివాసీల ఐకమత్య విజయం దశాబ్దాలుగా ఫారెస్ట్ అధికారుల వేధింపులు, రికార్డుల గందరగోళం మధ్య నలిగిపోయిన రామన్నగూడెం ప్రజలు, ఈ విజయాన్ని తమ ఐకమత్యానికి నిదర్శనంగా భావిస్తున్నారు. మేము కోరుకున్నది మా భూమిపై మాకున్న చట్టబద్ధమైన హక్కు మాత్రమే. మా పట్టుదలే మమ్మల్ని గెలిపించిందని, ఆదివాసీ ప్రతినిధులు హర్షం వ్యక్తం చేశారు. ఏప్రిల్ 1 నుండి జరగబోయే సర్వేలో అధికారులు ఇచ్చిన మాట నిలబెట్టుకుని, తమ కష్టాలకు శాశ్వత పరిష్కారం చూపాలని గిరిజనులు కోరుతున్నారు.
