వ్యవసాయ కళాశాల విద్యార్థుల ప్రతిభా పురస్కారం

పయనించే సూర్యుడు న్యూస్ ఏప్రిల్ 3 అశ్వారావుపేట మండలం రిపోర్టర్ భద్రాద్రి కొత్తగూడెం జిల్లా అశ్వారావుపేట లో స్థానిక వ్యవసాయ కళాశాల విద్యార్థులు జాతీయ మరియు రాష్ట్ర స్థాయిలో తమ ప్రతిభను చాటుతూ కళాశాల కీర్తిని దశదిశలా వ్యాపింపజేస్తున్నారు. కళాశాల అసోసియేట్ డీన్ డాక్టర్ జె. హేమంత కుమార్ ఆధ్వర్యంలో కళాశాల ప్రాంగణంలో ప్రతిభావంతులైన విద్యార్థులకు ఘనంగా సన్మాన కార్యక్రమం నిర్వహించారు. ఈ సందర్భంగాప్రధానమంత్రి నరేంద్ర మోడీ తన 'మన్ కీ బాత్' కార్యక్రమంలో భాగంగా ప్రత్యేకంగా అభినందించిన కే. రఘువీర్ రెడ్డిని ఈ సందర్భంగా కళాశాల యాజమాన్యం ఘనంగా సన్మానించింది. గ్రామీణ అభివృద్ధి లేదా నూతన ఆవిష్కరణల్లో రఘువీర్ చూపిన చొరవను ప్రధాని గుర్తించడం కళాశాలకే గర్వకారణమని డీన్ పేర్కొన్నారు. ఢిల్లీలో విజయవంతంగా ప్రజెంటేషన్ ఇచ్చిన రెండో సంవత్సరం విద్యార్థిని ఎస్. సాత్వికను డీన్ సన్మానించారు. రాష్ట్ర స్థాయి పోటీల్లో పాల్గొని ఉత్తమ ప్రతిభ కనబరిచిన రెండో సంవత్సరం విద్యార్థి మహర్షి వేద వ్యాస్ ను కూడా ఈ సందర్భంగా ప్రత్యేకంగా అభినందించి సత్కరించారు. డా. హేమంత కుమార్ మాట్లాడుతూ విద్యార్థులు కేవలం పుస్తక జ్ఞానానికే పరిమితం కాకుండా, సామాజిక స్పృహతో పాటు వక్తృత్వ, నాయకత్వ నైపుణ్యాలను పెంపొందించుకోవాలని సూచించారు. భవిష్యత్తులో అన్ని రంగాల్లో రాణించి ఉన్నత శిఖరాలను అధిరోహించడమే విద్యార్థులు తమ ఉపాధ్యాయులకు ఇచ్చే నిజమైన గౌరవమని ఆయన అన్నారు. వివిధ రాష్ట్ర, జాతీయ స్థాయి పోటీల్లో పాల్గొని గెలుపొందిన విద్యార్థులందరినీ ఆయన ప్రశంసించారు. ఈ కార్యక్రమంలో కళాశాల ఎన్ఎస్ఎస్ ప్రోగ్రాం ఆఫీసర్లు డి. స్రవంతి, డాక్టర్ పి. ఝాన్సీ రాణితో పాటు సీనియర్ అధ్యాపకులు డాక్టర్ నాగాంజలి, డాక్టర్ రాంప్రసాద్, డాక్టర్ జంబమ్మ, డాక్టర్ శిరీష, డాక్టర్ దీపక్ రెడ్డి మరియు పెద్ద సంఖ్యలో విద్యార్థులు పాల్గొని కార్యక్రమాన్ని విజయవంతం చేశారు.