డ్రైవర్ల సేవలు వెలకట్టలేనివి: జహీరాబాద్ పట్టణ ఎస్.ఐ. కె. వినయ్ కుమార్

పయనించే సూర్యుడు ఏప్రిల్ 8: (సంగారెడ్డి జిల్లా జహీరాబాద్ మండలం ప్రతినిధి స్వాతి.నర్సిములు ) సమాజ గమనంలో డ్రైవర్ల పాత్ర అత్యంత కీలకమని, వారి కష్టార్జితం మరియు అంకితభావం మెచ్చుకోదగ్గవని జహీరాబాద్ పట్టణ ఉప నిరీక్షకుడు (ఎస్.ఐ.) కె. వినయ్ కుమార్ కొనియాడారు. డ్రైవర్ల జీవన పోరాటాన్ని, వారు పడే శ్రమను గుర్తిస్తూ ఒక ప్రత్యేక సందేశాన్ని అందించారు. నిరంతర శ్రమ: కంటిమీద కునుకు లేకుండా, కన్నవాళ్లకు, కట్టుకున్నవారికి దూరంగా ఉంటూ రోజుల తరబడి ప్రయాణాలు చేస్తూ గమ్యాన్ని చేరుస్తారని గుర్తుచేశారు. యంత్రం వేడిని, కాళ్ల నొప్పులను భరిస్తూ కఠినమైన పరిస్థితుల్లో కూడా పట్టుదలతో పని చేస్తారని పేర్కొన్నారు. బాధ్యతాయుత ప్రవర్తనతో రవాణా మరియు రక్షక భట నిరీక్షకులు తనిఖీలు చేసినప్పుడు సరైన పత్రాలు చూపుతూ, చట్టానికి సహకరిస్తూ ప్రయాణికులను, సరుకులను సురక్షితంగా చేరవేస్తారని అభినందించారు. తక్కువ చదువు చదివినప్పటికీ, వివిధ ప్రాంతాలు తిరుగుతూ అనేక భాషలు మాట్లాడగలిగే ఏకైక వ్యక్తి డ్రైవర్ అని ప్రశంసించారు.ఎన్ని అవమానాలు ఎదురైనా, కనీస సదుపాయాలు లేకపోయినా, తన కుటుంబం కోసం నిరంతరం పోరాటం చేసే 'డ్రైవర్ అన్న'కు సమాజం ఎల్లప్పుడూ గౌరవం ఇవ్వాలని వినయ్ కుమార్ సందేశం ఇచ్చారు. 'డ్రైవర్ అన్నా.. నీకు సలాం' అంటూ వారి పట్ల తనకున్న గౌరవాన్ని చాటుకున్నారు.