పయనించే సూర్యుడు, జనవరి 11, బచ్చన్నపేట మండల ప్రతినిధి: నీల పవన్. బచ్చన్నపేట మండలంలోని కొన్నె గ్రామంలో ఆధ్యాత్మిక శోభ సంతరించుకుంది.గత ఐదు రోజులుగా మినలాపురం ఉషా-హన్మంతరావు దంపతుల నివాసంలో జరుగుతున్న వేడుకలు శనివారం పార్వతీ పరమేశ్వరుల దివ్య కళ్యాణంతో కన్నుల పండువగా ముగిశాయి. ఈ వేడుకకు జనగామ ఎమ్మెల్యే పల్లా రాజేశ్వర్ రెడ్డి ముఖ్య అతిథిగా హాజరై స్వామివారికి ప్రత్యేక పూజలు నిర్వహించి ఆశీస్సులు పొందారు.వేద పండితుల మంత్రోచ్ఛారణల మధ్య గత ఐదు రోజులుగా గ్రామంలో శాస్త్రోక్తంగా పూజా కార్యక్రమాలు నిర్వహించారు.చండీ హోమం,రుద్రహోమం మరియు మహా పూర్ణాహుతి వంటి కార్యక్రమాలను భక్తిశ్రద్ధలతో పూర్తి చేశారు. ఈ కళ్యాణ మహోత్సవాన్ని వీక్షించేందుకు కొన్నె గ్రామంతో పాటు చుట్టుపక్కల ప్రాంతాల నుంచి వేలాది మంది భక్తులు తరలివచ్చారు. విచ్చేసిన భక్తులందరికీ నిర్వాహకులు భారీ స్థాయిలో అన్నదాన కార్యక్రమం ఏర్పాటు చేశారు.ఈ కార్యక్రమంలో సర్పంచ్ కోడూరి స్వర్ణలత శివకుమార్ గౌడ్, బీఆర్ఎస్ నాయకులు ఇర్రి రమణారెడ్డి, చెంద్రారెడ్డి, చల్లా శ్రీనివాస్ రెడ్డి, వేముల స్వప్నసాగర్ గౌడ్ మరియు ఇతర ప్రజాప్రతినిధులు, గ్రామస్తులు పెద్ద సంఖ్యలో పాల్గొన్నారు.
