పయనించే సూర్యుడు / జనవరి 17 / దిడ్డి రాము / జమ్మికుంట రూరల్; రాష్ట్ర ఎన్నికల సంఘం, జిల్లా ఎన్నికల సంఘం ఆదేశాల మేరకు జమ్మికుంట మునిసిపాలిటీ పరిధిలోని అన్ని పోలింగ్ స్టేషన్లకు సంబంధించిన ఫైనల్ పబ్లికేషన్ ప్రక్రియ పూర్తయిందని మునిసిపల్ కమిషనర్ మహమ్మద్ అయాజ్ వెల్లడించారు.ఈ ఫైనల్ జాబితాను జమ్మికుంట మునిసిపల్ కార్యాలయంలోని నోటిస్ బోర్డులో అధికారికంగా ప్రచురించినట్లు ఆయన తెలిపారు. ఈ సందర్భంగా కమిషనర్ మహమ్మద్ అయాజ్ మాట్లాడుతూ, రాష్ట్ర ఎన్నికల సంఘం జారీ చేసిన మార్గదర్శకాలు, నియమ నిబంధనలకు పూర్తిగా అనుగుణంగా పోలింగ్ స్టేషన్ల ఫైనల్ పబ్లికేషన్ను చేపట్టినట్లు చెప్పారు. డ్రాఫ్ట్ పబ్లికేషన్ అనంతరం ప్రజలు, రాజకీయ పార్టీల ప్రతినిధుల నుంచి అందిన అభ్యంతరాలు, సూచనలను సమగ్రంగా పరిశీలించి, అవసరమైన మార్పులు, సవరణలు చేపట్టి ఈ తుది జాబితాను సిద్ధం చేసినట్లు వివరించారు. ఎన్నికల ప్రక్రియలో పారదర్శకత, న్యాయబద్ధతను కాపాడడమే ప్రధాన లక్ష్యంగా ఈ ప్రక్రియను నిర్వహించినట్లు కమిషనర్ స్పష్టం చేశారు. ప్రతి వార్డు పరిధిలోని పోలింగ్ స్టేషన్ల స్థానం, ఓటర్లకు అందుబాటు, మౌలిక సదుపాయాలు వంటి అంశాలను పరిగణలోకి తీసుకొని ఫైనల్ నిర్ణయం తీసుకున్నట్లు తెలిపారు. మునిసిపాలిటీ పరిధిలోని ప్రజలు, రాజకీయ పార్టీల ప్రతినిధులు ఈ ఫైనల్ పబ్లికేషన్ను పరిశీలించి, తమ వార్డుకు సంబంధించిన పోలింగ్ స్టేషన్ వివరాలను ముందుగానే తెలుసుకోవాలని కమిషనర్ సూచించారు. తద్వారా ఎన్నికల సమయంలో ఎలాంటి అయోమయ పరిస్థితులు తలెత్తకుండా సులభంగా ఓటు హక్కు వినియోగించుకునే అవకాశం ఉంటుందని ఆయన అన్నారు. రానున్న ఎన్నికలను సజావుగా నిర్వహించేందుకు మునిసిపల్ యంత్రాంగం పూర్తి స్థాయిలో సిద్ధంగా ఉందని కమిషనర్ తెలిపారు. పోలింగ్ స్టేషన్ల వద్ద మౌలిక వసతులు, భద్రత, సిబ్బంది నియామకం వంటి అంశాలపై ప్రత్యేక దృష్టి సారిస్తున్నామని చెప్పారు. ఎన్నికల సంఘం ఆదేశాల మేరకు ప్రతి పోలింగ్ స్టేషన్లో అవసరమైన సదుపాయాలు కల్పించనున్నట్లు పేర్కొన్నారు. ఈ ఫైనల్ పబ్లికేషన్ కార్యక్రమంలో, మునిసిపల్ మేనేజర్ జి. రాజిరెడ్డి, టిపివో శ్రీధర్, టి.పి.బి.వో దీపిక, ఏఈ వికాస్, సీనియర్ అసిస్టెంట్లు వాణి, భాస్కర్, వార్డ్ ఆఫీసర్లు, ఇతర మునిసిపల్ సిబ్బంది పాల్గొని ప్రక్రియను విజయవంతంగా పూర్తిచేశారు. పోలింగ్ స్టేషన్ల ఫైనల్ పబ్లికేషన్ పూర్తవడం ద్వారా జమ్మికుంట మునిసిపాలిటీలో ఎన్నికల నిర్వహణకు మరో కీలక ముందడుగు పడినట్లయిందని అధికారులు అభిప్రాయపడ్డారు. ప్రజాస్వామ్య పండుగ అయిన ఎన్నికలను ప్రశాంత వాతావరణంలో, న్యాయంగా నిర్వహించేందుకు ప్రతి ఒక్కరి సహకారం అవసరమని ఈ సందర్భంగా అధికారులు కోరారు.
