పయనించే సూర్యడు / మార్చ్ 28/ ఉప్పల్ ప్రతినిధి సింగం రాజు డాక్టర్ ఏఎస్ రావు నగర్ డివిజన్ పరిధిలోని జమ్మిగడ్డ శ్రీ శివసాయి నగర్ కాలనీలో వెలసిన శ్రీ ముత్యాలమ్మ దేవాలయ ప్రాంగణం శుక్రవారం భక్తి నినాదాలతో మారుమోగింది. శ్రీ పరాభవ నామ సంవత్సర చైత్ర మాస శుద్ధ నవమిని పురస్కరించుకుని కాలనీ వెల్ఫేర్ అసోసియేషన్ ఆధ్వర్యంలో శ్రీ సీతారాముల కళ్యాణ మహోత్సవాన్ని అత్యంత వైభవంగా, కన్నుల పండువగా నిర్వహించారు. కాలనీవాసులంతా ఒక్కటై జరుపుకున్న ఈ వేడుక ఆధ్యాత్మిక శోభను సంతరించుకుంది. శాస్త్రోక్తంగా కళ్యాణ క్రతువు ఈ ఆధ్యాత్మిక మహోత్సవం కుందనపల్లి బాలమణి – నర్సింహ దంపతుల చేతుల మీదుగా అత్యంత భక్తిశ్రద్ధలతో సాగింది. ఉదయం 11 గంటల నుండి అర్చకులు వేద మంత్రోచ్ఛారణల మధ్య, మంగళ వాయిద్యాల మోతతో కళ్యాణ క్రతువును శాస్త్రోక్తంగా జరిపించారు. సీతారాముల ఉత్సవ విగ్రహాలను సర్వాంగ సుందరంగా అలంకరించి, ఎదుర్కోలు ఉత్సవం, జీలకర్ర బెల్లం, తలంబ్రాల వేడుకను భక్తుల జయజయధ్వానాల మధ్య నిర్వహించారు. కళ్యాణం అనంతరం మధ్యాహ్నం 1 గంట నుండి భక్తులకు భారీగా తీర్థ ప్రసాద వితరణ చేపట్టారు.!తరలివచ్చిన భక్తజనం
ఈ కళ్యాణ వేడుకను తిలకించేందుకు శివసాయి నగర్ కాలనీతో పాటు చుట్టుపక్కల ప్రాంతాల నుండి భక్తులు పెద్ద సంఖ్యలో తరలివచ్చారు. ‘జై శ్రీరామ్’ నినాదాలతో ఆలయ పరిసర ప్రాంతాలన్నీ ఆధ్యాత్మిక చైతన్యంతో నిండిపోయాయి. భక్తులకు ఎటువంటి ఇబ్బందులు కలగకుండా, ఎండ తీవ్రతను దృష్టిలో ఉంచుకుని కాలనీ అసోసియేషన్ సభ్యులు చలువ పందిళ్లు, తాగునీరు వంటి అన్ని ఏర్పాట్లు పక్కాగా పర్యవేక్షించారు. ఈ కార్యక్రమంలో మాజీ కార్పొరేటర్లు పజ్జురి పావని మణిపాల్ రెడ్డి, కొత్త రామారావు, ప్రముఖ నాయకులు కాసం మైపాల్ రెడ్డి, కుమారస్వామి, నాగేశ్వర్ రెడ్డి, కాశ్యాపి రెడ్డి, మణెమ్మ ముఖ్య అతిథులుగా హాజరై స్వామివారిని దర్శించుకున్నారు. వీరితో పాటు కాలనీ వెల్ఫేర్ అసోసియేషన్ ప్రెసిడెంట్ జానీకి రాములు, జనరల్ సెక్రటరీ పి. ప్రసాద్, దేవాలయ చైర్మన్ గడ్డం శ్రీనివాస్, వైస్ ప్రెసిడెంట్ కాటం రాజు, కాలనీ అసోసియేషన్ ప్రతినిధులు, సీనియర్ సిటిజన్లు, మహిళలు మరియు భక్తజన బృందం అధిక సంఖ్యలో పాల్గొని మొక్కులు తీర్చుకున్నారు. ప్రతి ఏటా ఇలాంటి ధార్మిక కార్యక్రమాలు నిర్వహించడం వల్ల కాలనీలో ఐకమత్యం, ఆధ్యాత్మిక భావం పెంపొందుతాయని నిర్వాహకులు ఈ సందర్భంగా ఆకాంక్షించారు.
