పయనించే సూర్యుడు ఏప్రిల్ 6 కర్నూలు జిల్లా ఇంచార్జ్ శ్రీకాంత్. డాక్టర్ బాబు జగ్జీవన్ రామ్ 118వ జయంతి సందర్భంగా డి హెచ్ పి ఎస్ ఆదోని నియోజకవర్గం మరియు పట్టణ కమిటీ ఆధ్వర్యంలో ఆలూరు రోడ్డులోని తిమ్మారెడ్డి బస్టాండ్ సర్కిల్ వద్ద ఉన్న ఆయన విగ్రహానికి పూలమాలలు వేసి ఘనంగా నివాళులు అర్పించారు. ఈ కార్యక్రమం డిహెచ్పిఎస్ నాయకులు కే ఈరన్న, ఏ విజయ్ కుమార్, ఎస్ కుమార్ స్వామి, ఆర్ భాస్కర్ వారి నాయకత్వంలో నిర్వహించబడింది. ముఖ్య అతిథులుగా సిపిఐ పార్టీ పట్టణ కార్యదర్శి వీరేష్, సహాయ కార్యదర్శి కె రమేష్ కుమార్, జి అంజిత్ గౌడ్ పాల్గొన్నారు. ఈ సందర్భంగా నాయకులు మాట్లాడుతూ, బాబు జగ్జీవన్ రామ్ భారత స్వాతంత్ర్య సమర యోధుడిగా, దళితుల హక్కుల కోసం పోరాడిన గొప్ప సామాజిక న్యాయవాదిగా చరిత్రలో చిరస్థాయిగా నిలిచారని కొనియాడారు. 1908 ఏప్రిల్ 5న బీహార్ రాష్ట్రంలోని చంద్వ గ్రామంలో జన్మించిన ఆయన, చిన్ననాటి నుంచే సామాజిక వివక్షను ఎదుర్కొని, అదే అన్యాయానికి వ్యతిరేకంగా జీవితాంతం పోరాటం సాగించారు. స్వాతంత్ర్య ఉద్యమంలో చురుకుగా పాల్గొని, క్విట్ ఇండియా మూవ్మెంట్ లో కీలక పాత్ర పోషించారు. స్వతంత్ర భారతదేశంలో కేంద్ర మంత్రిగా అనేక కీలక శాఖలను నిర్వహించిన ఆయన, ముఖ్యంగా ఇండియా పాకిస్తాన్ వార్ 1971 సమయంలో రక్షణ మంత్రిగా దేశానికి విశేష సేవలందించారు. ఈ యుద్ధం ఫలితంగా స్వతంత్ర దేశంగా అవతరించడం ఆయన నాయకత్వ ప్రతిభకు నిదర్శనం అని పేర్కొన్నారు. అలాగే 1977లో ప్రభుత్వంలో ఉప ప్రధానిగా సేవలందించిన ఆయన, ఎల్లప్పుడూ సామాజిక సమానత్వం, అణగారిన వర్గాల అభివృద్ధి కోసం కృషి చేశారని తెలిపారు. నాయకులు మరింతగా మాట్లాడుతూ, బాబు జగ్జీవన్ రామ్ ఆశయాలను కొనసాగించడం మనందరి బాధ్యత అని, సమానత్వ సమాజ నిర్మాణమే ఆయనకు నిజమైన నివాళి అవుతుందని పిలుపునిచ్చారు. ఈ కార్యక్రమంలో డిహెచ్పిఎస్, సిపిఐ నాయకులు, కార్యకర్తలు, స్థానిక ప్రజలు పెద్ద సంఖ్యలో పాల్గొన్నారు.“బాబు జగ్జీవన్ రామ్ ఆశయాలు చిరంజీవి కావాలి”
